وكل الشعب ماشى وعلى وشه الضيق
هنا أطفال تحت الكبارى جاعنيين
وناس كتير طالع عينيها ومطحونين
وغيرهم بيأكل كباب وسكان فى قصر
يبقى إنت أكيد .... أكيد فى مصر
لما تلاقى الشوارع كلها أكياس زبالة
ومجارى طفحة والطريق حالته حاله
هنا رغيف العيش لونه زى الأرض
ومرتب عيله كامله ميكفيش فرد
والبلد فيها فلوس ملهاش حصر
يبقى إنتى أكيد .... أكيد فى مصر
لما تلاقى الكبارى كلها أطفال شحاته
وناس ركبة العربيات فى منتهى الألطه
هنا الطريق تلقاه واقف بالساعات
والناس وقفة فوق بعض فى الإتوبيسات
وتنزل من البيت الصبح توصل شغلك العصر
يبقى إنت أكيد .... أكيد فى مصر
لما تلاقى واحد واقف بيبيع بليلة
علشان يجيب قوت يومه وما بيده حيله
هنا البلدية تيجى تيديلو الطريحة
ويجى ضابط يشتمو بألفاظ قبيحة
ويشدوه على القسم ويعصروه عصر
يبقى إنت أكيد .... أكيد فى مصر
لما تلاقى الشباب ملطعين على القهاوى
وعلشان يجيب القرش لازم يعمل حاوى
هنا لازم يبقالك وسطا فى كل مكان
وتحس إنك فى غابة والإسم إنسان
ولما نكسب مطش يقولوا عليه ده نصر
يبقى إنت أكيد .... أكيد فى مصر
لما تلاقى الإنتخابات بتتاخد بالدراع
وكل صاحب كرسى فينا إشترى وباع
هنا رجال الأعمال بتهرب بالقروض
وكل واحد واصل بيعدى الحدود
وكل ده مش على سبيل الحصر
يبقى إنت أكيد .... أكيد فى مصر
كل ده طبعا هزار ومش قصدى حاجة
وكل الشعب عايش ومش محتاج لحاجة
هنا الشباب لقيين شغل ومبسوطين
والإنتخابات نزيهة وأصحاب المناصب طيبين
وبلدنا مليانه بالإنجازات والنصر
علشان أنا أكيد .... أكيد فى مصر
بقلم / مروة ماهر
هناك تعليقان (2):
بس مصر ما تستهلش كل ده بجد وياريت تحولى تظهرى الجوانب المضيئه فيها
بجد بجد رائع وعلي فكرة الاحسن ان احنا نعرف عيوبنا ومننكرش مزايانا علشان في ناس بتتلكك رائع
طالب من جامعة حلوان
إرسال تعليق